काठमाडौं – लुम्विनी प्रदेशका प्रदेश प्रमुख अमिक शेरचनले संविधानको धारा १६८ को उपधार (२) अनुसार नयाँ सरकार गठनका लागि आह्वान गरेका छन् ।
संविधानको धारा १६८ को उपधारा २ अनुसार दुई वा दुईभन्दा बढी दल मिलेर सरकार गठनका लागि प्रदेश प्रमुखले आह्वान गरेका हुन् ।
प्रदेश प्रमुखको कार्यालय बुटवलले मंगलवार जारी गरेको विज्ञप्तिमा वैशाख १४ गते अपरान्ह ४ बजेभित्र नयाँ सरकार गठनका लागि प्रदेश प्रमुखले आह्वान गरेको उल्लेख छ ।
लुम्विनीमा नेकपा (एमाले) संसदीय दलका नेता लिला गिरी नेतृत्वको सरकारले प्रदेश सभाबाट सोमबार विश्वासको मत गुमाएको थियो । प्रदेश प्रमुखले संविधानको १६८ (२) अनुसार सरकार गठनका लागि आह्वान गरेकाले लुम्विनी प्रदेशमा कांग्रेस नेतृत्वको नयाँ सरकार बन्ने सम्भावना देखिएको छ ।
मुख्यमन्त्रीमा नेपाली कांग्रेसका संसदीय दलका नेता डिल्लीबहादुर चौधरीले ५३ जना सांसदको हस्ताक्षरसहित एक महिनाअघि नै नयाँ सरकार गठनका लागि दावी गरेका थिए । अहिले सोही समीकरण कायम रहेकाले बैशाख १४ गते विहीवार चौधरीकै नेतृत्वमा नयाँ सरकार बन्ने सम्भावना देखिएको छ ।